एम.बी.बी.एस. भर्ना छनौट कार्यक्रम स्थगित गरिएको सम्बन्धमा।

मदन पुरस्कार गुठीले सन् १९५५ देखि भारतको पश्चिम बंगालस्थित कोलकाताका ‘कोलकाता मेडिकल कलेज’ र ‘आर.जी.कार मेडिकल कलेज’मा एम.बी.बी.एस.का लागि भर्ना हुने विद्यार्थीहरू छनौट गर्दै आएको छ। रानी जगदम्बा कुमारी देवीको पहलमा शुरू भएको यस सहकार्य अन्तर्गत हालसम्म कूल ११८ जना नेपाली नागरिकहरू योग्य चिकित्सकका रूपमा आ-आफ्नो कार्यक्षेत्रमा कार्यरत हुनुहुन्छ।

तर, भारतको सर्वोच्च अदालतद्वारा मिति अप्रिल २८, २०१६ मा भएको निर्णय अनुसार भारतका मेडिकल कलेजहरूमा भर्नाका लागि NATIONAL ELIGIBILITY CUM ENTRANCE TEST (NEET) उत्तीर्ण गर्नुपर्ने अनिवार्य व्यवस्था गरेकाले यस वर्ष २०७३ का लागि छनौट भएका दुई विद्यार्थीहरूले हालसम्म भर्ना पाउनु भएको छैन। गुठी हाल देखा परेको यो अप्रत्यासित घटनाप्रति चिन्तित छ र समस्या समाधानका निम्ति आवश्यक पहलका निम्ति अग्रसर छ।

यसै अन्यौललाई मध्यनजर राख्दै अर्को सूचना प्रकाशित नभएसम्मका लागि आगामी वर्षका निम्ति हुने भर्ना छनौट प्रकृयाका सम्पूर्ण कार्यक्रमहरू हाललाई स्थगित गरिएको छ।

मदन पुरस्कार गुठी

लेख रचनाका लागि नेपाली त्रैमासिकको अनुरोध

nepali_logo_smमदन पुरस्कार गुठीको मुखपत्रका रूपमा विसं २०१६ सालदेखि निरन्तर रूपमा प्रकाशित नेपाली त्रैमासिकले २२६ औं अङ्कदेखि आफ्नो स्वरूप तथा र प्रकाशन हुने विषयवस्तुमा केही हेरफेर गर्न लागेको छ। गुठीका सदस्य सचिव कुन्द दीक्षित सम्पादक तथा दीपक अर्याल सह-सम्पादक रहने गरी प्रकाशित हुन लागेको नेपाली त्रैमासिकका तर्फबाट गत ५७ वर्षदेखि अविच्छिन्न रूपमा सम्पादकीय नेतृत्व दिने गुठीका अध्यक्ष श्री कमल दीक्षितज्यूप्रति हार्दिक आभार प्रकट गर्दछ।

नेपाली त्रैमासिकले छापा तथा पठन संस्कृति, पुस्तक, पत्रपत्रिका, मुद्रण, पुस्तकालय, अभिलेखालय आदिसँग सम्बन्धित लेख रचनाका साथै अभिलेखमा आधारित टिप्पणीहरू प्रकाशित गर्ने लक्ष्य लिएको छ। विगतमा जस्तै यहाँहरूको निरन्तर सहयोगको अपेक्षा राख्दै यहाँहरूको अध्ययनमा आधारित लेख रचनाहरू प्रकाशनका लागि पठाइदिनु हुन हार्दिक अनुरोध छ।

लेख-रचनाका सम्बन्धमा:

१)   यसभित्र पुस्तक, छापा, पत्रपत्रिका, प्रकाशन, फोटोग्राफी, अभिलेख, पुस्तकालय तथा अन्य विषयमा गरिएका खोजमुलक लेख, टिप्पणी, संस्मरण, अन्तर्वार्ता तथा ऐतिहासिक दस्तावेजहरू समावेश हुनेछन्।

२)   माथि उल्लिखित विषय बाहेक ऐतिहासिक सामग्री, पुस्तकालय वा अभिलेखमा आधारित अन्य विषयका लेख-रचनाहरू पनि यसभित्र समावेश हुन सक्नेछन्।

३)   लेख रचनाहरू मौलिक हुनुपर्नेछ तर ऐतिहासिक दस्तावेज, दुर्लभ लेख रचना, पुस्तक अंश वा समीक्षा पुन: प्रकाशन हुन सक्नेछन्। छापा संस्कृतिसँग सम्बन्धित अन्य भाषाका सामग्रीहरू पनि नेपाली भाषामा अनुवाद गरी समावेश गर्न सकिनेछ।

४)   लेख-रचना सामान्यत: १५०० शब्ददेखि ५००० शब्दसम्मका हुनेछन् तर आवश्यकता अनुसार यस्ता लेखहरू छोटा वा लामा पनि हुन सक्नेछन्। लेखसँगै दिइने नक्शा, फोटो, तालिका वा अन्य सामग्रीहरू प्रकाशनका लागि अनुमति लिने जिम्मा लेखकको हुनेछ।

५)   प्रकाशनका लागि प्राप्त लेख-रचना फिर्ता नहुने भएकाले लेखकले उक्त लेखको प्रति सुरक्षित राख्‍नु पर्नेछ।

६)   प्राप्त लेखहरूमा कुनै परिमार्जन आवश्यक देखिएमा परिमार्जनका निम्ति लेखकसँग अनुरोध गर्न सकिनेछ। सम्पादन कार्य पूरा भएपछि प्रकाशन स्वीकृति लिन लेखकलाई अन्तिम प्रारूप देखाइनेछ।

७)   अभिलेख टिप्पणीका हकमा अभिलेखको तस्बिर, स्रोत, आकार तथा अन्य विवरण खुलेको हुनुपर्नेछ। सोही अभिलेखका आधारमा टिप्पणी वा लेखसँग उक्त अभिलेखको तस्बिर समावेश गर्नुपर्नेछ।

८)   युनिकोड नेपाली फन्टमा टाइप गरिएको लेख निम्न ठेगानामा पठाउन सकिनेछ।

सम्पर्क ठेगाना

सम्पादक
नेपाली त्रैमासिक
पोष्ट बक्स नं ४२,
पाटनढोका, ललितपुर।
Email:nepali@mpp.org.np